Um unga sýnendur
________________________________________________________________________________

Ungir sýnendur / Junior Handling
- tekið saman af Auði Sif Sigurgeirsdóttur –

Nokkrir mjög góðir punktar sem vert er að hafa í huga þegar keppt er í flokki ungra sýnenda og einnig þegar hundur er sýndur almennt á hundasýningum.

Ungir sýnendur
Ungir sýnendur er fyrir krakka og unglinga á aldrinum 10-17 ára. Keppt er í ungum sýnendum á hundasýningum um allan heim. Í ungum sýnendum dæmir dómarinn hvernig hundur er sýndur, sem sagt, hvernig honum er stillt upp og hvernig hann er hreyfður, hvernig sambandið milli sýnanda og hunds er og síðast en ekki síst hvort ungi sýnandinn veit hvernig á að framfylgja Gullnu reglunni. Gullna reglan er þannig að ALDREI má sýnandinn verða á milli hunds og dómara því markmiðið er það að sýna dómaranum hvernig hundurinn ykkar lítur út en ekki þið sjálf. Hundurinn er ALLTAF megin punkturinn.

Markmið flokks ungra sýnenda er að æfa góða sýnendur fyrir framtíðina, til að auðvelda dómurum á sýningum starfið sitt og til að hundurinn sýni sínar bestu hliðar í dómi.

Á sýningunni spyr dómarinn oft einhverra spurninga sem sýnandinn verður að gera svarað!

Líklegar spurningar dómara í keppni:

  • Hve gamall er hundurinn?
  • Hvaða tegundahóp (grúbbu) tilheyrir hann?
  • Hvert er ræktunar/heimaland tegundarinnar?
  • Hversu margar tennur eiga hundar að hafa?

Nauðsynlegt er að afla sér eins mikilla upplýsinga og hægt er um tegundina sem sýnd er því dómarinn gæti spurt um hvað sem er. Gott er að lesa tegundabækur og einnig er mjög gott að verða sér út um bækur um unga sýnendur. Til dæmis: Junior Handling (the young person´s guide to dog showing) eftir Jacqui Hurley. Margar ungra sýnenda bækur fást á hundasýningunni Crufts og einnig má finna þær á internetinu.

Undirbúningur
Undirbúningur sýnandans og hundsins er mikilvægur. Gott er að hreyfa hundinn og gera með honum eitthvað sem honum finnst skemmtilegt, bara sýnandinn og hann! Best er að hreyfa hann í taum til þess að hann verði vanur því að ganga í taum þegar kemur að sýningunni. Með þessu tengir hann sýnandann sem skemmtilegan og mikilvægan og þar af leiðandi verður sambandið þeirrra á milli betra. Mjög gott er að æfa hundinn að standa með því að stilla honum upp fyrir framan spegil en gæta þess að gera það ekki of oft svo hann verði ekki leiður á því. Gott er að æfa allar hreyfingarnar, s.s. fram og til baka, þríhyrninginn og svo framvegis á stórum fleti og nota jafnvel stein sem dómara eða fá einhvern til að hjálpa sér. Nauðsynlegt er að hafa þekkingu á öðrum hundategundum því stundum láta dómarar sýnendur skipta um hunda sín á milli og þá er nú gott að vera búinn að öðlast smá reynslu með aðrar tegundir og það er því mjög mikilvægt að sjálfmennta sig að einhverju leyti.

Á sýningum biður dómarinn ykkur alltaf um að hreyfa hundinn og stilla honum upp!

Líklegar skipanir dómara:

  • Fram og til baka
  • Þríhyrningur/öfugur þríhyrningur
  • “L” eða “T” (stundum öfugt “L og "T"” en rétt “L” og "T" er til vinstri, svo til hægri)
  • Áttan “8” (mjög sjaldan, eiginlega aldrei en gott að kunna hana samt sem áður)
  • Fara hring
  • Fram og til baka, “L” eða “T” tveir og tveir saman. Þá er gott að vera búin að ákveða að annar sýnandinn segir “SNÚ” þegar best er að snúa. Þegar sýnendur fara tveir og tveir saman verða þeir að vera samtaka og vera á sama hraða.
  • Stilla hundinum upp
  • Sýna tennur/bit (þegar tennur eru sýndar er tanngarðurinn sem snýr að dómara sýndur fyrst, svo þann hinn sem er frá dómara og svo framtennur. Þegar bit er sýnt er allir tanngarðurinn sýndur í einu) Þegar tennur eru sýndar þarf sýnandi að gæta þess að vera ekki með figurna fyrir og að gera þetta eins snyrtilega og hægt er. Ekki má halda fyrir nef hundsins. ATH! Dómarinn á ekki að þurfa að beygja sig í allar áttir til að sjá tennur hundsins. Þess vegna verður sýnandinn að sýna dómaranum tennurnar, þ.e. beina munni hundsins í átt að dómaranum.

Klæðnaður

Stelpur:

Smart að vera í:

  • Hnésíðu pilsi og skyrtu, bol eða jakka við
  • Buxum og skyrtu, bol eða jakka við
  • Hnésíðum kjól
  • Dragt
  • Vera alltaf í penum skóm með lágum botni!
  • Gott er að fatnaðurinn sé með vasa þar sem hægt er að geyma nammi fyrir hundinn

Ekki vera í:

  • Flaksandi eða þröngu pilsi eða kjól
  • Of stuttu pilsi eða kjól
  • Jogging galla eða gallabuxum
  • Óhreinum fötum
  • Skóm með þykkum botni og ekki í háhæluðum skóm. Skórnir virðast klunnalegir og þið getið auk þess ekki hreyft ykkur eðlilega og þar af leiðandi hreyfir hundurinn sig ekki eðlilega
  • Skítugum íþróttaskóm

Hárið:

Verið með eitthvað smart í hárinu, spennur, teygjur, hárband eða hvað sem er sem hindrar að hárið sé í augunum á ykkur. ALDREI hafa hárið flaksandi því þá þurfið þið alltaf að vera að ýta því frá augunum sem dregur athygli ykkar frá hundinum og dómaranum.

Strákar:

Flott að vera í:

  • Jakkafötum
  • Buxum, skyrtu og vesti við
  • Buxum og skyrtu við eða flottri peysu (ekki íþróttapeysu eða hettupeysu!)
  • Vera í flatbotna skóm

Ekki vera í:

  • Gallabuxum eða jogging/íþrótta galla
  • Klunnalegum skóm með grófum botni
  • Skítugum íþróttaskóm

Hárið:

Vel greitt og snyrtilegt. Má ekki vera fyrir augunum.

MUNIÐ AÐ FÖTIN SEM ÞIÐ SÝNIÐ Í MEGA EKKI VERA Í SAMA LIT OG HUNDURINN SEM ÞIÐ SÝNIÐ! T.D. SVARTUR HUNDUR OG SVÖRT JAKKAFÖT/DRAGT ER EKKI ÆSKILEGT


Atriði sem vert er að hafa í huga þegar komið er inn í sýningarhring:

  • Að tala aldrei við dómarann af fyrra bragði
  • Vera alltaf kurteis við dómarann, sýningarritarann og alla starfsmenn sýningarinnar
  • Vera kurteis við aðra sýnendur og sýna íþróttamannslega framkomu, t.d. óska sigurvegurum til hamingju o.s.frv.
  • Alltaf að vera þolinmóð þótt hundurinn geri ekki nákvæmlega það sem þið viljið að hann geri. T.d. standi ekki kyrr eða hleypur á stökki eða vill kannski ekki hlaupa. Aldrei má skamma hund harkalega inni í hring!
  • Aldrei að sýna nein merki um pirring eða óþolinmæði. Þó að hundurinn geri ekki nákvæmlega það sem þið viljið skulið þið ALDREI gefast upp! Dómarinn metur það ef þið gefist ekki upp!
  • Hælið alltaf hundinum, klappið honum létt og eða gefið honum smá bita. Gætið þess að gefa hundinum ekki bita rétt áður en dómarinn kemur að skoða hann. Þá gæti kjaftur hundsins verið fullur af mat og það finnst dómaranum örugglega ekkert sérstaklega geðslegt
  • Að gera þríhyrninginn, “T”, “L” og fram og til baka eins vel og beint og hægt er. Gætið þess að hafa allar línur eins beinar og öll horn eins skörp og hægt er. Lítið ávallt upp til þess að sjá hvert þið stefnið og munið að nýta hringinn sem best, þ.e. ef þið eruð með stóra hunda sem þarfnast mikillar hreyfingar. Munið að byrja alltaf fyrir framan fætur dómarans og ath. hvert hann snýr
  • Gætið þess alltaf að stoppa ca. 1 og hálfan metra frá dómaranum þegar hundinum er stillt upp. Fjarlægðin þarf að vera næg til þess að dómarinn geti séð hundinn í heild sinni. Ef farið er oft nálægt dómaranum sér hann aðeins bak hundsins
  • Gætið þess alltaf að fylgjast með dómaranum, hvar hann er og hvað hann er að gera. Líta af og til á dómarann til þess að sýna honum að þið eruð meðvituð um hvað er að gerast. Aldrei horfa niður í gólf!
  • Gætið þess að vera ekki stíf í hreyfingum. Slakið á því hundurinn ykkar er meðvitaður um hvernig þið eruð og slakar því líka á.
  • Taumurinn má aldrei lafa úr lófanum. Hann verður að vera allur inni í lófanum en ekki vafinn utan um hendina
  • Horfið á hundinn, talið við hann og verið skemmtileg og glaðleg þegar þið hreyfið hann. Munið að tala róandi við hundinn og segið honum e.t.v. einhverja skemmtilega sögu!
  • Takið ávallt tillit til hinna sýnendanna, gætið þess að bilið sé ekki of stutt á milli ykkar og gætið þess að hafa hundinn ykkar ávallt í beinni línu við hundinn á undan
  • Stranglega bannað er að tala saman inni í hring nema brýna nauðsyn beri til!
  • Ekki vera svekkt ef ekki gengur allt sem skyldi. Þið gerið bara betur næst!
  • Hafið ávallt stjórn á hundinum ykkar og ekki láta hann flaðra upp á dómarann eða ykkur
  • Látið hundinn ávallt gera öll stykkin sín s.s. skíta og pissa, áður en haldið er inn í sýningarhöllina
  • EF HUNDURINN YKKAR GERIR STYKKIN SÍN INNI Í SÝNINGARHRING VERIÐ ÁVALLT MEÐ POKA MEÐFERÐIS OG HREINSIÐ UPP EFTIR HANN!
  • Brosið og verið stolt af hundinum ykkar og hafið gaman að þessu!
  • Þið getið alltaf notað reynslu ykkar úr ungum sýnendum þegar þið byrjið að sýna hundinn ykkar á sýningum
  • Verið alltaf snyrtileg til fara.
  • MUNIÐ ÁVALLT GULLNU REGLUNA! ALDREI FARA Á MILLI HUNDS OG DÓMARA! Verið alltaf tilbúin að skipta um hönd þegar þörf krefur
  • Gerið alltaf ykkar besta því ekki er hægt að gera betur en það. Munið að þetta er til að hafa gaman að númer 1, 2 og 3!

Hér fyrir neðan eru útskýringarmyndir af þríhyrning, hring, fram og til baka, L, T og fleiru

Ég vona að þessi samantekt hjálpi ykkur að skilja hinar ýmsu reglur ungra sýnenda og út á hvað þessi keppni gengur.

Gangi ykkur sem allra best í framtíðinni!

Kær kveðja, Auður Sif.
Netfang: tibra@heimsnet.is
S: 698-7142

Wende nach innen = skipta um hönd
Show wende = sýnandi tekur snúning með hundinn í vinstri hönd. Ath. hundurinn vísar ávallt að dómara!


Þríhyrningur. Ath. dómarinn eru sporin


Hringur þegar dómarinn er staðsettur inni í hringum


Fram og til baka. "L" Wende nach innen = skipt um hönd

Sýnt bæði með því að skipta um hönd og ekki


"L" Wende nach innen = skipt um hönd


"T"